Gazteriaren Biltzarra`06 badator!   >>web-gune berezia

Euskal Herriko Gazteriaren Kontseiluak (eHgk) bere jaiotzatik ia lau hilabete igaro diren honetan hainbat urrats eman ditu. Gazte eragileekin zein eremu ezberdinetan lanean diren gazteekin harreman andana izan ondoren baiezta dezakegu:

• Euskal Herri osoko eta pentsakera, sentsibilitate, eremu eta izaera oso ezberdineko gazte eragileek elkarrekin lan egiteko borondatea eta konpromezua erakutsi digutela. Eragileen artean sortutako ilusioak jarraipena izan duela eremu ezberdinetan lanean ari diren norbanako gazteekin izandako harremanetan.
• Gure herriaren zein gazteriaren kolektiboaren beraren garapenaren bidean urratsak emateko prestutasuna eta borondate argia dagoela.

Bide horretan, eHgk-ren funtzioek inoiz baino garrantzia handiagoa hartzen dute:

• Euskal Herriko gazteriaren bilgunea izatea
• Gazteriaren eskubideen defentsa egitea
• Gazteriaren parte-hartzerako guneen antolaketa (antolatu zein antolatu gabekoentzat)
• Instituzio ezberdinekin harremanak bideratzea
• Gazteriarentzat lehentasunezkoak diren egitasmoak bultzatu, sustatu eta lagundu (eremu bakoitzean eta baita maila orokorrean ere)

Hortaz, Euskal Herriko gazteria osoarentzat baliagarria izango diren parte-hartzerako guneak antolatzeko konpromezuan, Euskal Herriko Gazteriaren Biltzarra ezinbesteko tresna dela nabarmendu behar dugu. Edozein gaztek du bertan parte-hartzeko aukera, antolatuta dagoena eta ez dagoena. Hortaz, bertan hartutako erabakiak kudeatzeko eta garatzeko konpromezua du eHgk-k. Euskal Herriko Gazteriaren Biltzarra, gazteok eztabaidarako, proposamenak egiteko, adostasunetara heltzeko eta erabakiak hartzeko gune nagusia izatea nahi dugu. Hortaz, gazteon hitza eta erabakiaren bermerako gazteok dugun erabaki gune nagusia dugu. Biltzarra, gazteriak bizi duen egoera, dituen kezkak eta erronkak bideratzeko tresna egonkor eta eragingarria izatea nahi dugu. Horregatik, Gazteriaren Biltzarra urtero antolatzeko konpromezua hartu dugu.

Hortaz hauek dira Gazteriaren Biltzarraren oinarriak:

• Gazteriaren erabakigune eta eztabaidagune nagusia izatea nahi dugu
• Gazteriaren hitza eta erabakia bideratzeko tresna izatea nahi dugu
• Gazteon instituzio erabakitzailea izatea nahi dugu
• Gune parte-hartzaile eta irekia izatea nahi dugu

GAZTERIAREN BILTZARRA’06

Biltzarraren bigarren urtea izanik, aurtengoan eremu ezberdinetan gazte ikuspegitik dauden gabezien inguruan eztabaidatu eta gabezi horiei aurre egiteko beharrezkoak diren egitasmoak adostea da helburua. Hiru ataletan banatu dugu eztabaida:

1. Ekintzarako plana: eremu ezberdinetan (etxebizitza, gazte espazioak, aisialdia, euskara, kultura, laborantza,…) gazteriak behar dituen eta gazteria osoarentzat nahita nahiezkoak diren egitasmoak adostu nahiko genituzke eremu horietako bakoitzean.
2. Eskubideak: aurreko urtean Euskal Herriko Gazteriaren Eskubideen Karta aurkeztu zen eta aurten eskubide horiek bermatzeko beharrezkoak diren egitasmoen inguruan aritzea nahiko genuke.
3. Bitarteko amankomunak: eremu guztientzako gazteentzat, egitasmo guztientzat baliagarriak diren bitarteko amankomunak sortzea ezinbestekoa ikusten dugu eta hortaz, horiek zeintzuk diren definitu nahiko genituzke.

Gazteriaren Biltzarra ez da egun bateko ekimena; aitzitik, bere baitan ekarpenak egiteko eta ekimen ezberdinak proposatzeko gazteok dugun tresna da. Gaurtik aurrera abian jartzen dugu Gazteriaren Biltzarra’06 ren prozedura. Honakoak dira prozesu horrek dituen mugarriak:

• HERRIZ-HERRI MINTEGIAK, herri zein auzoetan bizi diren gazteengana hurbiltzeko konpromezuarekin, gure lurraldeko ia 40 txokotan, mintegiak antolatu ditugu. Bertan eremu ezberdinetan bizi den egoeraren eta egin beharrekoaren inguruan eztabaidatu nahi dugu eta gazteen ekarpenak jaso nahi ditugu. Egitasmo hitza erabiltzean ez dugu gaur egun eragileek abian dituzten egiatsmoak ordezkatu nahi; aitzitik, gazterai osoarentzat beharrezkoak diren eta gure garapaenari begira ezinbestekoak diren egitasmoez ari gara. (Mintegien data eta tokiak)
• EKARPEN FOROA: www.gazteriarenkontseilua.org/foroa. Bertan edozein gaztek izango du ekarpenak egiteko aukera, eremu ezberdinetan dagoen egoeraren inguruan edo garatu beharreko egitasmoen inguruan, ekarpenak azaroaren 10erarte egiteko aukera egongo da.
• GAZTERIAREN BILTZARRA’06 AZAROAK 18 ANDOAIN: Azaroaren 18an Andoaingo Bastero kulturgunean egingo dugun saioan, Euskal Herriko gazte guztiak daude gonbidatuta, eta bertan eremu ezberdinetan ateratako ondorioak, garatu beharreko egitasmoak eta orohar gure herriko gazteriaren garapenerako beharrezkoak diren hainbat egitasmo landuko ditugu. Egun honen inguruko xehetasunak aurrerago luzatuko zaizkizue.

Hortaz euskal gazteriari deialdi berezia egin nahi diogu:

• Herriz-herri burutuko ditugun mintegietan parte har dezala
• Bere iritzi, gogoetak ekarpenen bidez ager ditzan
• Gazteriaren Biltzarra’06ean prozesu osoan orohar eta Andoainen burutuko dugun saioan parte har dezala